走狗的bad faith ------ 講兩句四維出世的毒計

Beware that, when fighting monsters, you yourself do not become a monster... for when you gaze long into the abyss. The abyss gazes also into you.
― Friedrich Nietzsche

年度藝術家獎一事﹐以林超賢領獎告終﹐不出所料﹐睇得出四維出世設局害人的﹐幾乎沒有。最可惜﹐不少聰明網民亦沒看穿﹐反而爭先湧上圍毆林超賢﹐將《魔警》鞭撻。

表面看﹐見到香港人的馴服﹐見高拜見低踩﹐愛打落水狗。藝術發展局屬港共政治工具﹐控制創作自由﹐無恥影評人跟官方宣傳「融合」﹐全無知覺；深入談﹐則見到左膠文人經年累月合理化圍領「藝術綜緩」的宣傳效果﹐「藝術」這兩個字﹐變成影評人犯罪害人的通行證。

四維出世、家明呢班人(都係演藝學院、明報一族)﹐明明為私利﹐做極權政治工具﹐做走狗﹐想又食又拎﹐挑機玩獎項從缺(而無損他們的評審資格﹐可以年年雜交過繼權力﹐一直做下去)﹐典知香港已經變天﹐共狗勢大﹐「藝發局」不甘受辱﹐成今日亂局。

原來街邊兩狗咬嚙﹐為權力﹐狗咬狗﹐邊柒個會去分辯誰是誰非？ 影評人畀共狗玩番轉頭﹐就要硬食架啦﹐咪圍圍喂自己幾個人夾埋做戲﹐叫個秘書偽造會議紀錄﹐跪玻璃又好﹐牙簽插眼也罷﹐咪一路投票﹐投到林超賢得獎﹐四四六六拆掂佢咪算o羅。

殊不知四維出世想出一條敗部復活﹐用藝術的名義﹐將林超賢變成「怪物」的妙計。

「譬如說林導演不領獎，可能他下套戲《破風》會很賣座！電影界很實際，你是賣座導演就會『畀面』你！其實我不認為（不領獎）他會有甚麼損失。」

真係政治低能的人﹐先講呢的說話。咁你不做評審﹐都冇咩「損失」﹐你又做？你真係有無私奉獻﹐大愛精神。

四維出世扮低能﹐實際密底算盤很精刮﹐他算準了林超賢為名也好為利也罷﹐不敢拒絕港共獎項﹐於是搶佔藝術高地﹐置諸死地而後生﹐俟林氏從黃秋生手上接過獎座﹐一招多殺(毀了林氏、年度藝術家獎)。他就會隱匿潛伏﹐功成身退﹐繼續他底與世無爭﹐世外高人的身分。繼續跟同路人圍埋﹐替主子撚雀。

最可憐的﹐可能是家明﹐因為四維出世爭寵、搏出位﹐明明想置身事外﹐亦仕途盡毀﹐亦被錯手「絕殺」了。

最好笑﹐呢班盲毛重要附會到沙特拒領諾貝爾文學獎﹐而眾所周知﹐沙特拒領並非因為「程序不公義」﹐跟「藝術」無涉﹐而是他要保持獨立身分﹐拒絕所有來自建制、官方(遑論一個共產極權了)的附會、政治抽水。對倒番香港年度藝術家獎一事﹐根本係一班有名有姓的「影評人」﹐為利益﹐放棄自己的對嚴﹐爭先恐後去向權力先含後啜屹籮柚。無恥的是﹐佢地重想借刀殺人。

「山下綠叢中，露出飛簷一角，驚起當年舊夢，淚向心頭落。對他高唱舊時歌，聲苦無人懂。我不是高歌，只是重溫舊夢」
胡適

上youtube看李慧玲跟影評人對談﹐最耐人尋味是30:16﹐四維世出自稱「聯署未出的時候﹐好多人會問我其他四個評審是邊個」﹐幹嗎諱莫如深﹐連評審姓名都無法公開？

尋查一番﹐發覺不無難度﹐評審五人﹐暫時只找到四個﹐四維出世、馮家明、馮慶強、麥聖希﹐第五個是誰﹐至今不詳﹐如用偵探小說的genre﹐又如日本卡通《冰菓》﹐疑人只剩四個﹐「第五個」則在空氣中、密室中﹐消失了。講起偵探小說﹐亦想起克莉絲蒂的《東方快車謀殺案》﹐偵探白羅揭開謎局﹐十幾個疑犯聯合犯案殺人﹐各自有千絲萬縷的關係。

用現實操作看﹐四維出世初時隱藏其他評審名字﹐一是逼宮(早晚有人會問其他姓什名誰)﹐二是清算(攻擊其他得寵的寵物)﹐三是給他們下台階﹐留一手活口(不能排除有日馮家明﹐會重作馮婦﹐再上仕途)。最重要是第四點﹐只要熟知香港影評人醜惡的人﹐一看就知﹐這四個人﹐背後有著剪不斷理還亂的裙帶關係：

四維出世﹐兆基創意書院出身﹐被提攜入演藝﹐明報；
馮家明﹐年青人週報出身﹐被提攜入演藝﹐明報；
麥聖希﹐百老匯電影中心權臣﹐杜琪峰鮮浪潮合作人﹐香港粵語片研究會、電影資料館合作人﹐不斷放映無人問津﹐演藝出品(一個複雜故事、無涯等等)；
馮慶強﹐另一個新興戰線﹐香港粵語片研究會要人。

將這四個人的蛛網串連起來、亂交起來﹐終站至少有一個﹐舒琪。

從這四個人的亂交網﹐見到舒琪今日的工作﹐除了上facebook﹐膠化青年影迷﹐著博士袍行灣仔金鐘影相﹐亦有將膠化主流傳媒(明報、立場新聞、蘋果)混流﹐請幾個影評名人行事﹐模糊中國和香港電影邊界(不斷提拔中國人﹐拍偽香港獨立片)﹐由「生產線」開始操控(演藝學院)﹐再串連「藝術」影院(電影中心)﹐再搭通粵語殘片的無涯路﹐控制香港電影資料館的最終理想。有文人講過﹐左膠文人是要「自己綜緩自己批」﹐最終目標﹐是「文學館長自己做」。類比起來﹐舒琪又豈無此雄心壯志？替己謀後路﹐亦屬人情人常。更何況﹐文學館云云﹐虛無縹緲﹐電影資料館一座﹐早已座於西灣河。

循此路看﹐即明近日一套爛片《花街柳巷》﹐得學院少壯影評人青睞﹐附會到香港現壯(年輕人要插死老人)﹐會激起一個舒琪打手﹐新晉中年影評人很「激動」﹐要揮棍擊之。令新晉中年影評人 「激動」的﹐恐非片子太爛﹐而是有主流影評學會影評人﹐敢公然反抗(走入青年激進觀點)﹐替香港帶來東風。同樣是「後雨傘解讀」﹐維穩片《衝鋒車》舒琪一族無意見﹐但爛片《花街柳巷》，則要第一時間喝止﹐其中種種潛台﹐亦清楚不過了。

盲毛提過馬龍白蘭度、沙特﹐小弟亦想補記一個﹐活地倫的名言： I'd never join a club that would allow a person like me to become a member.

不用可憐兮兮的「解讀」﹐裡面其實是有可貴的自尊、自重﹐以獨立於一切制度以外而自許。我是「怪物」﹐你吹咩？
用學院少壯影評人的說法﹐容我「附會」：香港人要接受自己是「怪物」﹐「小心喪失了自己的」人格﹐「本性與特色」，「對象」不是誰﹐就是「香港人」自己。

《消滅港片之戰 ------ 由黃金時代得最佳電影談起》

一、許鞍華完成歷史任務

中國片《黃金時代》佔領香港金像獎﹐全民噤聲﹐人人接受(即使他們大部分都沒看過電影)﹐事實比什麼都更能見到香港電影之死。

相比數年前《打擂台》(所謂本土精神)得獎﹐左膠同仁歡呼﹐今次紅Van 全軍覆沒﹐佢地屁都唔想放一個﹐呢個見到「許鞍華」三個字的威力。中聯辦一毫子都唔駛畀﹐打手唔駛出﹐黑警唔需拔槍殺人﹐學院中人唔駛著博士袍﹐就令香港文化中心安靜地被中國人佔領﹐咁蝕幾億畀許氏拍蕭紅又何妨？簡直超值。共匪愛「香港」還是愛「黃金」？中國人多水過波多野老師呀。

回溯番許鞍華走過的路：
1984年英中聯合聲名﹐戴卓爾夫人賣港﹐許氏拍了《傾城之戀》(一個城市的陷落)。
1987年用香港左派資金﹐率先北上拍《書劍恩仇錄》。
1997年香港政權移交﹐拍《半生緣》(曼禎：我們再回不去了)。
2003年繼續北上﹐拍趙薇的爛片《玉觀音》
2012年《桃姐》橫掃香港
2014年中國片《黃金時代》得香港金像獎﹐完成任務。

假如話王家衛係計算(97拍happy together之類)﹐許氏實略無遜色﹐老謀深算﹐伏線更深。咁就能解釋﹐典解共匪會放任一個香港大學番書女出身的人拍蕭紅﹐畀你班香港文人自慰(附會蕭紅係香港文學)﹐又明知從往績看﹐唔會得歐洲影展獎﹐一切藝術上的作為都係徒勞無功。「黃時」結局香港淪陷﹐主角見不到光復之日就死了﹐實為最貼切的隱喻(連傾城之戀的狗男女都沒了)。許氏以為「黃金時代」四個字係調侃﹐係嘲諷(指蕭紅放浪日本的時代)﹐其實同社運撚打飛機分別不大﹐對匪類秋毫無損﹐扮野當做左。

許氏歷史任務真的完成了嗎？難說﹐依共匪或黑社會套路﹐只要有「剩餘價值」﹐冇咁易脫身。一如陳雲今期《熱血時報》文章﹐就算列寧死了﹐尸首依然在在﹐人民都要親眼去看﹐才能相信﹐卻又無法確定：列寧真的「死」了嗎？

今年杜琪峰、劉德鋒不見了﹐提名都冇﹐亦意味深長。共狗的策略很清楚﹐2014香港電影﹐最理想﹐由關錦鵬和趙薇中國片《放浪記》控制﹐不成器的話﹐則由《五個小孩》(離地中產救世精神)﹐或偽港片《衝鋒車》(秃鷹支持者)之類爛片補上。

許鞍華、陳可辛之類﹐香港票房奇低﹐鬼佬唔睇﹐可堵住香港愚民、共諜之口﹐卻得不了他們的心。消滅香港電影之戰﹐還看2016﹐杜琪峰、韋家輝、劉德華等等﹐已盡收旗下﹐養兵千日﹐盡在一朝﹐且看杜韋能否再創中國奇蹟﹐消滅香港電影。「黃時」佔領了香港人的肉體﹐讓「杜韋」再得到香港人的心。而香港電影棺材的最後一口釘﹐由賣港記錄片《無涯》裡﹐高唱失敗主義《海闊天空》的杜Sir補上﹐即使唱得荒腔走板﹐未成曲調也有愛﹐亦最適合不過了。

二、吳君如的Role-Playing Game

有網友提出《半支煙》﹐吳君如演一個不學無術﹐唔知冰心是誰的畫店老闆。呢個先係吳君如作為喜劇演員的特點：扮傻﹐role-playing。除了文盲﹐三四十以上的香港人﹐讀過書﹐真係會有人唔知冰心是誰嗎？唔知鄧小樺是誰﹐就很正常。

周星馳之類﹐演出中心是「人笑我瘋癲﹐我笑他人看不穿」。吳君如用陰性書寫﹐進入不了男權狀態﹐於是只能用醜婦、善良、可憐、想搵個好男人倚靠之類﹐完成她的丑角扮演﹐她的特點﹐是「扮傻」﹐而沒有深藏不露﹐其實聰明過觀眾的時刻。試想想﹐假如唔識Wim Wenders的是占基利、周星馳、黃子華﹐梗有的野既。外界會咁簡單﹐咁放心﹐瘋狂咁插嗎？ 吳氏跟商業電台權臣俞琤的友好﹐亦有向男權挑機的含意。咁先明《十二金鴨》﹐吳君如演男人(不是反串﹐直情是任劍輝那種)﹐重做埋導演的意義： 佢脫離不了陳可辛(如吳氏是「香港」﹐陳氏則是「中國」)﹐要建立一個自在自足的身分﹐只能通過role-playing。用RPG的角度看金像獎「蕭小姐」事件﹐就別有意思﹐跟過往從容自若不同﹐頒獎時佢成個人都震晒﹐可見裡面的勇氣係幾強﹐班男人唔見晒﹐女人一個上﹐這是吳君如另一次做「男人」的嘗試。有人指吳氏「侮辱蕭紅」﹐實是淺見﹐你千祈咪「矮化」吳君如﹐佢侮辱緊湯唯、許鞍華、成班著晒黑社會黑西裝的中國人呀。

再看一遍最佳電影頒獎片段﹐不止空前﹐肯定絕後﹐實在有太多弦外之音。小節不談﹐最值得注意是頒那一刻﹐未打開信封﹐吳氏已講「好想食炒蟹」﹐打開前﹐亦特登講「金像獎硬係要搞咁既野」(投共)﹐得獎者是「高登era.......」﹐即係將「紅Van (香港)vs 黃金時代 (中國)」﹐高登vs建制﹐作一對比﹐一個被消失的議題﹐放番上檯面。高登和era「膠合」(香港和中國很膠地融合)﹐佢一早已知係「黃時」得獎。依此看﹐吳君如所謂「金像獎一人一票﹐有最高門檻」﹐則有極強烈的調侃意味了(金像獎根本是假選舉)。呢個亦係金像獎的宿命﹐由私人party變了共狗的政治攻擊目標﹐可哀是香港人亦只能逢迎。香港再無一個是男兒﹐所以這是吳君如最成功的演出﹐而不需要有人鼓掌。

影迷用攻擊吳君如(就算人人都知是照稿讀)﹐來轉移了成個獎的「中國化」﹐亦係值得注意。呢個係香港主流影迷的轉型﹐佢地一直好順服﹐自我膠化﹐而對香港的「被中國化」﹐已經完全麻木﹐冇感覺﹐跟謊言說一百次會變真理相若﹐他們已不懂問﹐湯唯是「香港人」嗎？黃時是「香港片」嗎？

吳君如攻擊的極致﹐是問湯唯知唔知「蕭小姐」係咩？湯唯擰頭問隔離朋友﹐「講咩？」﹐呢個係「香港人」身分的測試。而最可怖的是﹐環顧日常四週﹐無數咁多識「蕭小姐」係咩的疑似香港人﹐個個飽讀詩書﹐而佢地其實都是跟共狗心曲暗通的匪諜。

最重要﹐蕭紅唔係「香港」作家。等於張愛玲唔係(佢地重好不屑添)﹐趙薇、湯唯都唔係「香港人」一樣。香港人沒有這個醒覺﹐一切甭談。
至於鄧小樺係唔係﹐我就唔敢講。
以上唔係反話﹐Game Over。

膠化杜琪峰 ------- 談偽港片《衝鋒車》

呢套o野唔係杜琪峰o個隻﹐似郭子健《打擂台》那種﹐又無聊又肉麻又cliche。

或者咁講啦﹐似「膠化杜琪峰」﹐例如《柔道龍虎榜》卡在樹上的紅氣球﹐變了蝙蝠俠圖案黃色波波﹐主題由一個人為理想默默而死﹐變成一班人露營放黃氣球做。類似拿黃傘週街行﹐就等於自己做左野。又例如結局一班賊佬背住夕陽小便﹐連打尿震﹐都是那麼的假(根本冇疴﹗)。

亦類似「旺角鳩嗚」有效﹐差佬無計可施﹐就有組織晚晚搵班人膠化佢(今日都未膠完)；「佔領金鐘」疑似會被差佬鎮壓﹐就有學院中人著博士袍﹐落場去監察佢﹐膠化佢咁啦。

香港電影冇咩剩低﹐杜琪峰一套依然work﹐就變了各方爭奪的「剩餘價值」。紀錄片《無涯》想搞新殖民﹐由香港人和中國人合作﹐re-define何謂「香港」；《衝鋒車》包裝成香港片﹐杜派黑社會片(吳鎮宇等一班老派香港演員)﹐內裡依然要膠化杜Sir﹐然後取而代之(杜Sir繼續北上中國不毛之地﹐消耗其意志﹐呢班新人則留港拍和諧片)。例如此片所謂「愛兄弟定愛黃金」﹐《黑社會》是調侃﹐用現實角度看其荒唐﹐而《衝鋒車》當真咁拍時(班盲毛黑社會真係咁諗)﹐觀眾重唔能覺得呢班黑社會(傳統港片價值)都係癲既咩？

好驚呢種抽水片﹐扮激進﹐好多符號﹐紅van啦、阿杜啦(有個角色叫Johnnie T)、官塘啦(銀河映像)、《無間道》啦(莊文強麥兆輝兩個柒頭)﹐重有差佬啦。

你以為佢挑差佬機咩？完全唔係個回事﹐呢套野根本向差佬歌功頌德。差人古巨基結局獨白佢要「除暴安良」﹐連魔警(徐步高)個名都食埋﹐計算到極。其潛台詞﹐即係咁：「賊佬」點會有好人呀(吳鎮宇班廢柴係打飛機)﹐反而「差佬」先係永遠忍辱負重﹐先係正義(不斷出現的superhero符號)。

留意古巨基和邵音音講﹐佢地係要捉賊﹐不是捉壞人。「好、壞」有道德判斷(即係要差人用腦﹐要質疑何謂正義)﹐「賊」就冇(犯法就要拉﹐差佬只係收錢做野的機器)。呢套野的陰毒﹐正是合理化「平庸之惡」(Banality of evil)﹐結局古巨基照足上頭order做野﹐但佢一樣係為「正義」獻身﹐付出自己﹗

呢套o野假扮賊佬有「好人」﹐但觀眾一睇就明﹐完全是打飛機(片尾班人話出冊後﹐要改裝漁船收服尖閣諸島云云﹐我就想話﹐中國內政關你隱事咩)﹐所以編導將成套戲拍成「笑片」(認真你就輸了﹐阿腥)；

反而呢﹐差人古巨基明明好假﹐設計不可信﹐但結局自願接受任務﹐做番臥底小巴司機﹐猛講粗口(即係由電影人物回歸「現實」﹐由假入真)﹐為正義忍辱負重(上司三年又三年的承諾﹐同一國兩制一樣﹐明明是騙局﹐佢都照信照做)﹐即係以一概全﹐用匪語﹐即係用個柒頭﹐將香港差佬個形象「優化」。
族大有乞兒﹐徐步高、旺角警署強姦報案人的魔警﹐亦不過是少數例子﹐古巨基先係香港差人的象徵。

呢個先係《衝鋒車》成個設計的point：
明明開頭「差佬」和「賊佬」﹐都係好假的柒人﹐但發展下去﹐「差佬」愈來愈真(結局做臥底小巴司講粗口﹐即係回歸日常)﹐班賊愈來愈假﹐變了《回魂夜》精神病人(壓軸大戰其實是真人卡通)﹐重話要同阿牛、長毛一班柒人﹐去收復「尖島」。咁你話啦﹐觀眾會認同哪一邊？ (真正有智慧的人﹐當然會小柒編導啦)

拍攝完全不合格(請看那幾場不知所謂的槍戰戲)﹐結局打鬥﹐重要Slow-motion﹐於我言簡直似畀人一刀一刀淩遲。

最好笑﹐片尾重特登鳴謝三幾十個香港老人導演﹐多謝一兩個就話者﹐黑社會曬馬乎？真係唔知咩用意。我只可以說﹐稍為有點傲氣﹐有特立獨行個性的人﹐都不屑咁向權貴獻媚。

又一部向極權交心﹐邪惡無恥的維穩片。