30 November 2014

“No one ever cried at a Bowie song” --- 談《戀戀小情歌》

《戀戀小情歌 God help the Girl》

呢套野的reference point﹐可能是《浴室春情Deep End》。
毒撚男主角o係個泳池返工﹐後來又偷聽癲婆女主角沖涼。
尾二場戲﹐亦踩單車離去。

《浴室春情》與《春光乍洩》同期﹐講London Swing﹐執剌刀劈劈劈;
呢套野則講搖滾衰世﹐蘇格蘭毒撚﹐閂埋門打飛機。
於是解釋了﹐搖滾衰敗的理由:幼稚、無聊、自我中心。

另外﹐一開頭就講Nick Drake, Ian Curtis﹐都係有心理病﹐又早死的搖滾樂手﹐搖滾精神肯定有大量自毀傾向﹐it's better to burn out than fade away。
《戀戀小情歌》則變了「陰性書寫」﹐當個歌星唔係男人﹐重係一個癲婆時﹐又會有咩發生?

一句重要對白﹐癲婆女主角話條毒撚﹐「"you're so feminine"」(大意)﹐於是解釋了典解毒撚咁憎Bowie:
既生瑜﹐何生亮﹐晚生三十年﹐只恨我天生不是女人﹗
由此路看﹐癲婆女主角即是毒撚的super ego (毒撚一直冇唱歌﹐end credit先出﹐露骨到極)。

最後癲婆女主角離開前夕﹐踩上門﹐即是毒撚男主角與super ego「結合」的最後機會。
毒撚都係安於現狀(「我會回到我的小房間」)﹐唔肯向外求突破﹐癲婆即刻拒絕畀佢上馬。
最後毒撚去送車﹐即送別理想的「超我」(癲婆)﹐除了傷風悲秋﹐自摑三巴﹐又有春用咩?

最後鏡頭﹐癲婆望住鏡頭微笑﹐是神來之筆。
戲中人直望鏡頭﹐自言自語什麼的﹐除了許鞍華《黃金時代》﹐有時看日本色情AV﹐都會見到:間離效果﹗
片子之前種種自我沉溺、自我陶醉、自我作賤﹐不過做戲﹐毒撚投射﹐打飛機而已。

咁interpret﹐當堂冇咁難睇wor﹐好似。

29 November 2014

「投先個套唔係藝術電影o黎o個wor」 ------ 談《點對點》

《點對點》

呢套o野是近年少見本土中產階級電影。

Michael Haneke、活地亞倫都恥笑中產﹐《點對點》則在替香港中產打飛機~

套戲開頭﹐講兩個主角﹐陳豪和中國女人來香港返新工﹐一個做設計工司高層﹐一個教普通話。
有趣的是﹐成套戲談工作的部分極少﹐主要講兩人到地鐵站外牆畫公仔﹐心曲暗通。
直白地講﹐即是二人皆無心工作﹐玩物喪志。
何解如此?因為二人都是有閑階級﹐扮香港是佢地屋企(一個祖籍吉林﹐一個闔家移民外國)。
假扮愛香港(其實不過是懷念英治﹐大把錢搵﹐生活舒暢的黃金時代﹐有事佢地第一時間走先)﹐呢個先係香港中產的共同願望。

於是可以解釋﹐何解《點對點》不斷有左膠客串(彈結他的金金、狂舞派導演等等)。
因為香港左膠﹐就算扮耕田﹐其實都飽讀屎片﹐都是「中產」。
左膠不是食飽唔憂米﹐大把資助﹐就是有無數不可告人的hidden agenda(例如有人可長年去南極考察﹐鍾意就由阿根廷飛回香港參加「佔中」)

主角陳豪開口埋口「慢活」﹐唔查私家車﹐重要去台灣環島踩單車﹐好笑在﹐佢又唔逼巴士、地鐵﹐成日坐爛口表哥架私家車﹐周圍噴黑煙個wor。
呢種就是香港中產:擺pose﹐懶偉大﹐實質不過偽善。

呢套o野亦講階級矛盾﹐用一個貪威識食的白痴OL做代表。
成套戲最嘔心的對白﹐如下﹐
OL: 「呢的藝術電影都幾悶個wor。」
陳豪:「投先個套唔係藝術電影﹐係獨立電影黎﹐獨立電影和藝術電影唔同個wor。」
OL :「......」
試問何其不可一世﹐又幾唔considerate的人﹐先可以咁恥笑低下層﹐咁同低下階層講o野呢。
我用影迷身分講句﹐我小你老母啦﹐陳豪。

最後公司裁員﹐陳豪自我犠牲﹐掛官而去﹐保住白痴OL份工﹐亦是中產階級的白日夢
(於是先明白套戲的前設:陳豪唔溝女、唔結婚、唔供樓﹐就是為了有朝一日可以隨時唔Do。
好型呀﹐你條仆街)。

你咪以為呢套野是新導演作品﹐於是好純真、稚拙﹐實際非常成熟、計算。
最工於心計﹐係陳豪個爛口表哥﹐猛鬧中國女人是「蝗蟲」。
問題是﹐觀眾一睇﹐呢個中國女人﹐樣靚、斯文、關心香港﹐佢邊忽似「蝗蟲」呢。
於是製造了一個以一概全的印象:中國人被鬧「蝗蟲」﹐真係冤枉呀。
呢個亦係香港中產的毛病﹐酒池肉林﹐不知人間何世﹐重自覺忍辱負重﹐好多屈辱。
有於職場、學院接觸中國人﹐就知﹐90%都唔係呢條女咁既樣貎、內容羅。
中產根本唔知今日中國人的惡毒、醜惡﹐香港後生一代、貧窮一族的憤怒、水深火熱。

套戲結局﹐簡直是日本相機廣告的畫面﹐夕陽下﹐兩個「失語」的人﹐中國女人講廣東話﹐陳豪講普通話﹐「點對點」﹐原來是「香港」接上「中國」。
配上家駒的歌《早班火車》﹐簡直是恥辱。

最後﹐呢套野最重要的符號﹐是《兒童樂園》﹐貫通了陳豪和中國女人。
我只想講﹐除了溫文爾雅的《兒童樂園》﹐同年代﹐還有粗魯不文的《龍虎門/小流氓》﹐《李小龍》等等(除了銅鑼灣的大丸﹐亦有旺角的先施、大大)。
有些人﹐其實兩種都有睇(例如我)。
要同此片製作者講階級和解(龍虎門和兒童樂園並讀)﹐亦不過夏蟲語冰。

28 November 2014

「你死我都未死呀﹐哥仔」 ------ 談《星際啟示錄》

《星際啟示錄》

呢套野好明顯源自鬼眼導演的《Sign》(Casey Affleck那個農場)。

鬼導演的戲﹐﹐都是開放式結局講一班精神病人﹐接受天命﹐打救世人﹐有人溺己溺精神。
《星際啟示錄》沿用不明來歷的「啟示」﹐接上了窮兵黷武﹐向外擴張的美國精神﹐馬修想救世﹐而最終都是徒勞:不僅沒Plan B﹐連Plan A都是騙局﹗

2001的黑色石板﹐變了《星際啟示錄》的機器人﹐人類亦自命為神﹐以「第一因」自居。

Alien拍於80年代﹐所謂女權擴張時代。《星際》則subtle得多﹐女人大權已握﹐希拉利完全擊倒奧巴馬﹐就適時退後一步﹐扮局外人﹐畀你班茂利(馬修)﹐做下救世主﹐打下飛機羅。(事實上馬修一場歡喜忽悲辛﹐老人院都唔收;而Jessica以逸待勞﹐重有仔送終添)

最「色情」的一段戲﹐當然是麥迪文駕住隻艇﹐想接上去架mothership(永續號﹗)﹐結果搞來搞去都係嘥氣;
馬修就唔同﹐一接就通﹐而成個過程﹐個mothership重不停旋轉添﹐真係比AV更神奇﹐笑到我碌地。

用男女權力鬥爭看﹐貓女要去外太空﹐因為要搵番個太空人死佬﹐非常合理。
貓女畀男人丟低於地球﹐歲月催人老;個死佬去外星﹐則青春常駐。用女人角度看﹐試問情何以堪呢﹐殺上太空鏟佢﹐呢個動機非常合理。
而馬修則有自毀傾向﹐也可視為父權的死心不息﹐想青春不老﹐唔肯死:你班不肖子孫﹐你死我都未死呀。

此片亦令我想起浦島太郎的故事。

山中方七日﹐世上幾千年﹐此片有看破愛情、人情、家庭的境界﹐凡此皆屬虛無﹐生亦何哀﹐死亦何苦。
人世間有很多價值﹐都比男女私情、兒女親情重要。
此片實在超越了癲狗式價值觀(男兒天職保家眷云云)。

而《星際啟示錄》 如何迴避浦島太郎的悲劇結局 (打開寶盒變成老人)﹐
答案是最後15分鐘﹐馬修發春夢(即inception:(美國)夢中有(白日)夢)。

繼續將貓女situate為一個弱者(好孤獨好可憐什麼的)﹐然後馬修駕太空戰機去救佢什麼的﹐無愧於打飛機。

胡說八道完畢。

27 November 2014

「我係人渣﹐你咪又係契弟」 ------ 談Legal High 2014 SP



兩個煙粥屎:《白色巨塔》與《秦博士》

今集真係白到無可再白﹐吉瀨美智子老公畀惡德醫生累死﹐告上法庭﹐最後跟扮好人的共犯講﹐「我不過想報仇而已」。
即係個女人告醫生﹐同公義無關﹐將所有道德問題(正義、是非、對錯)消去﹐衝突都源於個人利益、私人感受﹐冇客觀標準。個女人汲汲於替亡夫奔走﹐不過源於私憤而已。
編導最毒的是﹐吉瀨啱啱先做完話題作﹐人妻通姦劇《晝顏》﹐即係向觀眾暗示﹐呢個女人都唔係好人。
呢個先係Legal High的中心:將所有問題曖昧化﹐變成人身攻擊﹐你話我係賤人﹐你自己咪又係仆街。

咁睇就明﹐第一輯堺雅人鼓動村民反抗﹐後成為網上熱傳片段﹐只是盲毛美麗的誤會。
堺雅人叫弱者拍檯﹐戰鬥﹐重點不是公義、正義﹐而是源於仇恨﹐保護自己利益﹐類似Mark哥的名句﹐「我要羅番我失去左既野」﹐大家起來發洩獸慾。
咁樣反抗﹐未嘗不是正當理由﹐只是此劇的中心﹐底色陰險﹐結底是犬儒﹐所有人都為私利做事﹐成與敗端乎個人手段(如堺雅人一把爛口)。
聯結返套劇的中心﹐Legal High其實更接近左膠套路﹐如葉寶琳:泯滅一切是非標準﹐賤人做賤事﹐亦各有前因﹐自有其道理﹐應該同情包容體諒﹐沒有誰比誰更高尚。
左膠唔識推﹐反而變了熱血神劇﹐世事何其弔詭。

今集有兩個典故﹐一個是《白色巨塔》﹐一個是《怪醫秦博士》﹐當然係賤人堺雅人的自我戀投射。
利慾薰心的唐澤壽明(《白》)﹐與收巨額診金的無牌醫生秦博士﹐同樣是「惡德」醫生﹐一樣瘋狂要錢﹐卻有微妙的分別。唐澤是希臘悲劇式的﹐為追求高超醫術﹐登上巴別塔﹐最終天譴;秦博士則是神一樣的存在﹐有賞善罰惡的意味。

《秦博士》第一話就講﹐一直逼害博士的醫生會長﹐兒子命危﹐哀求博士﹐博士亦將他遞上的醫生執照撕毀。呢個先係《秦博士》的妙處﹐好像是偏鋒人物﹐卻有著最清楚的道德是非標準。
而堺雅人將自己投射到唐澤﹐亦講明用動機合理化一切手段。唐澤草菅人命﹐壞事做盡﹐但他有著最崇高的夢想:要日本醫學進步。
於是今集﹐其實是第一輯「村民反抗」一集的兩生花:
在掌握最高權力者(如醫生、如律師、如警察)口中﹐在最崇高的理由(如社會發展、如醫學進步、如和諧安寧)面前﹐市民不過是待屠殺、被犠牲的傻羊而已。
此一時彼一時﹐堺雅人第一輯懶正義﹐鼓動村民反檯﹐ 2014 SP﹐則幫惡德醫生開脫﹐觀眾稍有理性就會問﹐如何說得通?
響左架啦﹐呢套野一直宣傳緊道德虛無主義。

26 November 2014

「搣時﹐鍾意咪揀多次o羅」 ------ 《談單身男女2》

《單身男女2》

呢套野玩到最後﹐又係玩「搶婚」。
類似情節﹐《高海拔之戀》講明後設係假﹐元祖《畢業生》﹐男女目光呆滯﹐一句對白都冇﹐講的則是無意義和不安。
《單身男女2》結局﹐古仔爬上紫禁之癲﹐搶到高圓圓﹐講的則是虛無。

成套戲的戲劇推動力﹐是錯摸、怨恨、妒嫉。搶唔到條女﹐夜夜夢迴重開心﹐反而證明到是「真愛」。
最「感動」的一場戲﹐是古仔回去圓圓舊居﹐睹物思人﹐先訓得最好。
呢個可能係此片最清醒的要點:
唔理溝緊既係咩女﹐係溝到既一刻(即係確認左個女人的「愛」)﹐其實男人就即刻覺得虛無﹐想閃。
兩次求婚﹐都係爬山/爬大廈﹐楊千嬅同高圓圓懶開心﹐即刻有大波妹行過﹐古仔就流鼻血﹐即是用肉體本能(鼻血)﹐來掩蓋男主角對愛情的懷疑。(鼻血可見,愛則存疑)

最後古仔同圓圓搭lift﹐個構圖同《畢業生》結局一樣﹐照拍即可,編導夠膽唔要大波妹入lift﹐hold住鏡頭三十秒﹐零對白﹐睇佢兩條友畀咩反應﹐那種難堪的相對﹐我敢說呢套野層次即刻昇一級。
真係咁拍﹐(女)觀眾可能會比港女(楊千嬅)反應更大﹐即刻反檯。
反而圓圓笑住替古仔抺鼻血﹐先係最迎合到女人心理﹐也是最犬儒的一筆。

25 November 2014

「妳好講o羅wor﹐賤人」 ------- 談《渴罪》

《渴罪》

呢套野最好笑﹐役所廣司的對白﹐講來講去都係幾句:
「去死啦」
「仆街」
「我個女去左邊﹐妳好講o羅wor﹐賤人」
聽說「好男人」的標準﹐除了學歷、有錢﹐最要緊是好笑。一個唔該﹐遇著件咁既廢柴﹐大家相對無言﹐我都反檯啦。

呢套野唔啱女人﹐但好啱有言語障礙、燥狂、思路不清、時時有幻覺的觀眾 (例如我)。
睇到一個位﹐我就很投入:
橋本愛同役所廣司坐係架私家車度傾偈﹐講唔夠兩句﹐兩個人就互罵﹐兜頭互劈﹐反而感情加深。
試想叫我同橋本愛坐埋一架車﹐傾五分鐘偈﹐諗下可以傾咩﹐應該傾咩﹐我都要諗三年﹐諗到腦殘廢啦。有咩方便過南泉斬貓﹐不立文字﹐用棒球棍代替語言﹐用血來換愛呢?

很多茂利話此片暴力﹐我又唔覺﹐主角役所廣司相當虧﹐亦唔似那些嘔心韓片﹐反而周圍無厘頭閑角﹐比主角更變態。當然最要緊﹐電影係用了很多特殊效果﹐包括歇斯底里剪接、時有時無聲效、音樂間離、時空轉換﹐隨意插入心理鏡頭﹐令人覺得唔真﹐或令觀眾無法投入。
於此片context﹐所謂間離﹐除令觀眾抽離(一切皆假)﹐更重要可能是調侃男權。
呢個先係令觀眾不爽的理由:血唔真﹐笑唔出﹐喊唔落﹐人唔似人﹐最後暴力麻木。
同前作比﹐此片最大唔同﹐係從講女人的悲慘故事(如《花樣奇緣》女主角向父親求愛)﹐轉了言語無味﹐打打殺殺中回歸父權(變成爸爸對女兒愛之欲其死)。

於是《渴罪》中谷美紀﹐可視為《花樣奇緣》松子和《告白》(松隆子)的結合:
《告白》教師替女復仇﹐替天行道﹐背後不失有其道德基礎;
但進入了《渴罪》的context﹐政府公權腐敗(妻夫木聰代表的黑警)﹐懲罰中谷美紀行私刑殺人的﹐不是「法治」﹐反而是伊一直渴望得到「父愛」﹐由父權代表役所廣司執行﹐雪地上﹐一下一下砸來﹐擊出腦漿的鐵鏟。
女人的悲劇從未改變﹐此片則加上男人的:
父權委靡不振﹐但死前都要揮一揮鐵鏟/球棒﹐這是最「男人」的抉擇。

23 November 2014

「o的仔女唔係你o架﹐老爺」-------談Dumb and Dumber To

Dumb and Dumber To

散場時有個師奶話:
「車﹐美國真係有人係咁架」
咁低俗喜劇﹐竟會有觀眾當真(即係睇時有感通)﹐真是最高的compliment。

周星馳是人笑我瘋癲,我笑他人看不穿,很香港人﹐即是懶醒和smart-ass﹐亦即是扮傻﹐於是觀眾覺得係做戲。占基利的不同﹐則是心理創傷後的真癲。

呢套野最得意﹐是兩個主角都有一場假戲真做﹐認真做(即係做返常人會做的事﹐入返常人生活的範疇)﹐反而係「假」(即痴痴呆呆才是「真」)。

今集好清楚﹐呢兩個柒人﹐可隱喻為60年代愛與和平﹐吸毒的hippies﹐胡塗半生﹐一直on the road﹐又唔肯死﹐變成bum﹐百無聊懶﹐於是有了成功溝女、有兒有女的夢幻。
中年漢一朝夢醒﹐無啦啦多左個「女」(硬係唔會係「仔」個wor)﹐荷里活拍過很多啦。
最近是《星際啟示錄》﹐一個不負責任的爸爸(馬修)﹐浪遊回家﹐Jessica同佢講﹐「o的仔女唔係你o架﹐你走罷啦﹐你去火星溝女啦﹐阿爸﹗」

放番入Dumb and Dumber To的context﹐麻甩佬無啦啦多左個「女」﹐即是skip o左常人人生無數咁多個steps(讀書、溝女、畀家用、搵錢、扮上進、買樓、見世伯伯母、買金、結婚、噓寒問暖、忍受種種屈辱、揳大個女、同中國人搶奶粉搶學位、打柒溝自己個女的賤種等等)﹐一朝夢醒﹐即刻去拍《畢業生》﹐飛車去教堂﹐流住眼淚﹐等賤人搶婚﹐來帶走自己個女。呢個世界﹐邊有咁便宜既事呢。

末了揭穿所有夢幻﹐先見到今集的清醒。
最後一場戲﹐兩個柒頭繼續溝女﹐但靚女典會受溝?正合兩個柒頭心意﹐根本佢地就唔想溝到。

第三集其實已拍左﹐是占基利的Man on the Moon。